Sunday, June 20, 2021

Ученици од струшкото основното училиште „Браќа Миладиновци“, во улога на филмски ѕвезди, модни дизајнери и кореографи

Триесеттина ученици од основното училиште „Браќа Миладиновци“ од Струга го демонстрираа својот талент во областа на модата, танцот и глумата, за време на мултимедијалниот настан што се одржа на почетокот на јуни во објектот „Театри Пошка“. На овој несекојдневен настан, учениците се претставија со модна парада на фустани од материјали за рециклирање, кратко видео со сцени од познатата американска серија “Friends”, како и со две музички точки на песни на англиски јазик, “Granada” од Бруно Марс и ”Focus” од Ариана Гранде.

Настанот го организираа наставничките-ментори Јасмина Кукунешоска и Селпи Пошка, кои неколку месеци работеа со учениците и заеднички ги подготвуваа мултимедијалните точки. „Сметаме дека токму овие проекти претставуваат двигател за зајакнување и негување на мултикултурализмот во едно меѓуетничко опкружување како што е нашето училиште, а и самиот град Струга “ – истакна Кукунешоска.

Задоволни од сработеното беа и главните ѕвезди на настанот – учениците. „Преку танцот, глумата и модната парада се повеќе се дружевме и зближувавме со нашите врсници од 4-то одделение “ – вели Сара Мицкоска, една од учесничките во проектот,.

На настанот, кој се организираше со поддршка на Проектот на УСАИД за меѓуетничка интеграција во образованието, учествуваа и 4 родители, кои помагаа во подготовките за настанот  –  фотографираа, ги шминкаа учесниците и се грижеа за нивните фризури.

2 3 4 5 6 7 8 9