Sunday, October 17, 2021

Музиката нè спојува

DSC02431Како е терминот за ‘folk songs and dances’ на македонски? Народни песни и ора. А на албански? Këngë dhe vallë popullore. А на ромски? Folklornikane gjilja thaj vastkhelibe. Благодарение на Музичкиот глосар/речник изготвен од осмо – одделенците од ОУ „Браќа Рамиз Хамид“ и ОУ „7-ми марси“ од Скопје, го збогативме нашиот музички вокабулар на четири различни јазици (англиски, македонски, албански и ромски).

На 20-ти мај, група ученици од „7-ми марси“ го посетија партнерското училиште „Браќа Рамиз Хамид“ со цел да ги промовираат плодовите на напорната работа, дел од Проект на УСАИД за меѓуетничка интеграција во образованието. Покрај Музичкиот глосар/речник, учениците во етнички измешани групи изработуваа музички инструменти од картон, цртежи на фолклорни орнаменти, носии и имаа заеднички настап на оркестрите.  Сите нивни производи беа презентирани пред бројната публика на ученици и наставници од двете училишта.  Заедничкиот оркестар исполни неколку нумери на албански, македонски и ромски јазик, додека помладите ученици танцуваа облечени во традиционални носии.DSC02509

Наставниците од двете училишта беа задоволни од взаемната професионална соработка, горди на производите кои нивните ученици ги презентираа. Откако заврши официјалната програма, учениците и наставниците ја претворија салата во подиум за танцување, танцувајќи заедно на популарни ромски, македонски и албански песни. Натписот на ѕидот, испишан на трите јазици, не потсети дека „Музиката нè спојува.“