Thursday, June 17, 2021

Репортерите од „Михајло Пупин“ не известуваат: освоивме прво место на конкурс за еко-филм !

По обуката за создавање на информативни мултимедијални содржини за Интернет која ја одржавме минатиот месец за наставниците и учениците од скопските средни училишта, не чекавме многу за да ги добиеме првите плодови на нашата заедничка работа. Учениците од Средното електротехничко училиште на Град Скопје „Михајло Пупин“, кои учествуваа на неа, не известуваат за една многу радосна вест за нивното училиште. Имено, на конкурсот „Млади репортери за животна средина“ кој го спроведуваше невладината ОХО од јануари до април годинава, филмот „Приказна на 21 – от век“, кој го изработија  младите „пупиновци“, ја освои првата награда, во конкуренција од 38 средни училишта од земјава.

Филмот го изработија средношколците Ангел Давковски, Стојан Ѓоревски и Стефан Тодоровски, под менторство на професорката Мирјана Недевска. Тие, во текот на овие месеци, сами режираа и глумеа во овој видео продукт, наменет за подигање на еколошката свест кај младите.

Особено радува фактот што овој филм ќе биде испратен и на интернационалниот натпревар од кампањата, каде ќе се натпеварува со учесници од 25 земји, a учениците ќе имаат можност да се дружат со нивни врсници од различни култури и различни потекла. А дека во „Михајло Пупин“ се посветува многу внимание на поттикнување на креативноста на младите и градењето на позитивни вредности на овој начин, говори и фактот дека тие и лани победија на истиот конкурс, додека на интернационалниот натпревар го освоиле третото место и учествувале на работилници во Стокхолм.

„Пупиновци“ не се само добри филмаџии. Со оваа известување, тие покажаа дека ги совладале и техниките на новинарството, и ни напишаа приказна која ги содржи сите елементи кои ги научивме заедно на работилницата за создавање мултимедијални информативни содржини во Скопје, со цел да не известат за нивниот успех.

Еко – приказната за 21 век на овие креативни средношколци можете да ја погледнете линкот: https://www.youtube.com/watch?v=iU_oa7z-MYY