Sunday, October 17, 2021

„А може и подобро..“ – порачуваат младите актери од „Цветан Димов“

DSC04929Првото училиште кое го скрши мразот и организираше финална презентација на уметничките продукти, кои произлегоа од креативните работилници на Проектот на УСАИД за меѓуетничка интеграција во образованието, е СУГС „Цветан Димов“ од Скопје. Дваесетина талентирани и креативни ученици од ова училиште, со помош на нивните две професорки и професионални актери, подготвија претстава од четири дела, со наслов „А може и подобро..“. Претставата беше проследена со ентузијазам од страна на  раководството на училиштето, учениците и голем број професори.

На претставата, учениците одглумија четири различни ситуации од секојдневниот живот кои ги мачат младите, со цел да прикажат дека нивните проблеми не познаваат етничка или религиозна припадност, и дека денешната младина треба да се обедини во нивното решавање. Креативните работилници се докажаа како успешна алатка за меѓуетничката интеграција во образованието, а креативноста и уметноста како „универзален јазик“ на учениците од различни етнички и верски припадности.

По завршувањето на претставата, публиката во салата ги награди младите актери со заслужен аплауз, а тие пак, во нивните костуми и маски, гордо и насмеано застанаа да ги поздрават сите присутни. На овие ученици им беа доделени сертификати во знак на благодарност за дадениот придонес во подобрување на меѓуетничката интеграција во образованието и за тоа дека поставија одличен пример за останатите пет училишта кои се при крај со подготовките за нивните финални презентации.

DSC04975ПМИО ги спроведуваше креативните работилници во соработка со партнерите од Центарот за изведувачки уметности „Мултимедиа“, организација која има долгогодишно искуство во спроведување на ваков тип на активности со младите.