Thursday, October 28, 2021

Турнир во кошарка во СГГУ „Здравко Цветковски“ – за јакнење на спортскиот дух, толеранцијата и соживотот

IMG_4414newОд 5 до 12 декември, во спортската сала на СГГУ „Здравко Цветковски“ од Скопје се одржа турнир во кошарка. Средношколците од ова училиште, поделени во четири мешани екипи, приредија пет дена на меѓусебно интензивно дружење, соработка, почит и фер игра.

Пред почетокот на турнирот, организаторите формираа четири екипи, по една за секоја наставна година, а секоја од екипите беше составена од осум „кошаркари“ и „кошаркарки“. Екипите беа мешани, и тоа не само по наставен јазик, туку и по пол. Натпреварувањето беше замислено така што секоја екипа имаше можност да игра со сите други екипи, а најдобро пласираните две екипи играа финале на крај на турнирот. Учениците од втора година покажаа дека возраста не е пресудна во спортот, и со пожртвуваност, фер игра и тимски дух, ги надмудрија останатите екипи, освојувајќи го турнирот.

Забавата и спортот не престанаа со финалето. На покана од Училишната заедница, професорите и професорките, кои предаваат на различни наставни јазици, го прифатија предизвикот да одиграат ревијален меч со победничката екипа Главниот резултат – уште поголема сплотеност и блискост помеѓу младите и возрасните, учениците и наставниците,  Македонците, Албанците, Турците, кои за време на целиот турнир дишеа во духот на заедништвото. Победници на турнирот не беа само учениците од втора година, туку цело училиште, бидејќи сите заедно демонстрираа дека заедно – се може сè.