Saturday, October 16, 2021

Различни, а обединети: заедничка прослава за Денот на детето во Тетовско

20140528_151228Со спортски натпревар, садење дрвца и заедничко дружење, учениците и колективите на партнерските училишта ОУ „Асдрени“ од с. Глоѓи, Тетовско и ОУ „Страшо Пинџур“ од с. Јосифово, Валандовско, го одбележаа Меѓународниот ден за заштита на децата, 1 јуни. На заедничката манифестација, која се одржа во селото Глоѓи во прекрасен природен амбиент под Шар планина, доминираа насмевките и возбудата, играта и  дружењето, кои како од шега ги бришеа етничките, родовите и возрасните граници.

Учениците ја започнаа програмата со спортски натпревар, формирајќи две осумчлени мешани екипи, со по четири играчи од училиштето домаќин и од училиштето гостин. Беше прекрасно да се проследи како децата се радуваат и си даваат меѓусебна поддршка за време на играта, која помина во одлична и фер атмосфера. По спортскиот натпревар, учениците  и наставниците од двете училишта, заедно со родителите од училиштето–домаќин и претставници од ПМИО и секторот за образование на општина Теарце засадија дрвца во „Паркот на другарството“. За крај на прекрасното дружење, вработените од училиштето „Асдрeни“  подготвија преубава закуска,  на која се служеше традиционална храна  од овој крај, подготвена специјално за гостите од Валандово.

Координаторот од партнерското  училиште „Страшо Пинџур“  изјави дека предрасудите кои ги имале за Албанците пред да склучат договор за соработка, повеќе ги нема. Член на училишниот совет и родител во ОУ „Асдрени“ пак изјави дека манифестацијата била на високо ниво,  и дека има прекрасни впечатоци од соработката меѓу двете училишта.  И младите и возрасните од двете училишта ветуваат дека дружењето и соработката ќе продолжат и понатаму.  А насмевките и среќата на нивните лица се доказ дека овој тип на активности се вистински погодок во напорите за интегрирање и зближување на младите во земјава, кои без оглед на разликите, покажуваат дека имаат многу заеднички интереси и работи кои ги зближуваат.  Оваа креативност и ентузијазам заслужуваат поддршка.